+25 °С
Облачно
Ял илыш
14 Мая , 05:19
Каныш кечым пайдалын эртарышна
Кугу Ачамланде сарыште сеҥымашым кондышо коча-кована-влакым митингыште порын шарналтышна. Тунемше-влак почеламутым каласкаленыт, мурым йоҥгалтареныт; кугурак-влак салам мутым ойленыт, сарын шучкылыкшым шарналтеныт; почётный караул шке пашажым шуктен, курымашлык тул йÿлен, шарнен илыме лÿмеш памятник воктеке пеледышым пыштыме.
Авторын колтымо фото-влак.
Сеҥымаш кечым пайремлымек, 10 да 11 майысе каныш кечылаште Тынбай ялыштына субботникым эртарышна, вер-шőрнам тÿзаташ 84 еҥ ушныш. Тошто йочасад территорийыште шочын шогалше ваштарым руэн, тÿрлő куштыра деч эрыктышна, тушечын машина-влак 13 рейсым ыштышт. Почта, «Алан» кевыт, пожарный воктенсе верлам шотыш кондышна, ялыш пурымаште чашкерым руэн эрыктышна. Пеш кугу таум каласыме шуэш В. Абдулинлан, В. Ибашевлан, Вениамин Шамратовлан, Владимир Шамратовлан, А. Айбашевлан, В. Ибашевлан (Шке машинашт да тракторышт дене полшышт.) Ялсовет вуйлатыше Д.Д. Янгубаеват őрдыжеш кодын огыл. Бензопила дене пÿчкедыме пашам шуктышо-влакымат палемден кодымо шуэш: А. Шаймарданов, Ф. Баязов, В. Алкаев, Р. Янситов, А. Миксонов, Э. Захаров. Моло пőръеҥышт товар дене шогылтыныт, ÿдырамаш-влак машинаш нумалыныт, шÿкым эрыктеныт. Туныктымо пашан ветеранже, 80 ийым эртыше сарын икшывыже А.Т. Тимуршин, ийготым ончыде, чыла дене тőр шогылтын. Каныш жаплан олала гыч унала толшо-влакат ушненыт: Р. Шамыкаев, Д. Минаев. Вет чылан умылена: ялнан моторлыкшо, арулыкшо - тиде ял калыкнан тÿсшő. Ял илыш верч тыршыше тыгай икоян еҥ-влак улмылан чон куана, кажныжлан кугу деч кугу таум каласыме шуэш.