+3 °С
Пылан
Все новости
Ял илыш
25 Ӱярня , 12:35
25 март - Тӱвыра пашаеҥын кечыже. Ик ой дене, ваш келшен
Лапкашор - мыланна, Илиш районышто илыше-влаклан, шкешотан марий рӱдер гай. Икымшыже - Анач. Кок ялжат маркым кучаш тыршат гынат, пытартыш жапыште Лапкашорышто марий койыш-шоктыш виянрак ылыжмыла чучеш.
Л.М. Сайфутдинова кушкын толшо тукымымат марий калыкын тӱвыражым шымлаш, шочмо йылмым пагалаш кумылаҥда. Авторын колтымо фото-влак.
Адакше моло верла гычат тышке артист-влак чӱчкыдынрак толыт. Марий калыкын йӱлашкыжак пурен, концертым але моло мероприятийым эртарат гынат, мучашлан, фоешке лектын, гармонь почеш тывырдыкым куштат. А Лапкашорышто тиде шӱлыш поснак чот шижалтеш. Шоҥгыжат, ӱдыр-рвезыжат, школыш коштшыжат, толшо калыкымат пырля кушташ ӱжын, ваш куанен ончалын, южгунам шинчам чымалтен да тӧршталтен тошкалын, ик еҥ тошкалме гай чаткан чон йодмо тывырдыкым куштат.
Концерт чоныш пайрем шӱлышым пуртен шуктен огыл гынат, тывырдык тӱргоч овартен колта! Тиде сӱретым ончен, куанен шоналтет: «Ила але марий шӱлыш, пагала калыкем шке койыш-шоктышыжым».
Лапкашор ялын чолга еҥже-влак районысо Сабантуй пайремыште.
Мутат уке, тыгай койышым, шӱлышым эре пӱсемден да вияҥден толман.
Тӱвыранам вияҥдыме шотышто Пазлогар кыдалаш школышто марий йылмым да литературым туныктышо, Илиш районысо марий мер ушемым вуйлатыше, шочмо калыкше верч тургыжланыше Любовь Сайфутдинова да клуб вуйлатыше Леонид Сайфутдинов кугу пашам намият. Нунылан эреак Фазлыева Лида акай, Андреевка селаште ила гынат, полшаш толын шуэш. Тунемше-влаклан ожсо мурым, куштымашым туныкта. Арамлан огыл кугем шушо тунемше-влак, нунылан тауштен, «Ракмат, телефоным ӧрдыжкӧ пыштыктен, марла кушташ-мураш, такмаклаш туныктымыланда» маныт.
Лапкашор клуб ял покшелне мӱндырчак волгалт коеш, эртен кайышым пагален пураш ӱжеш. Клуб ончылно лумым эрыктыме, кӧргыштыжӧ ару, фойем чеверын сӧрастарыме. Толшо уна-влак ончылно чевергаш ок верешт, мӧҥгешла, куанен кугешныман веле. «Могай пашам гына огына шукто гынат, чылажымат калык дене погынен ыштена. Чывым кочкаш гына кок еҥ сита, маныт, клуб паша шуко еҥын вийжым йодеш. Тидын шотышто ме эре Л. Фазлыевалан, В.В. Сайфутдиновлан, Т.К. Базуевалан, Н. Гарайшиналан, Альбина ден Сергей Тимиркаевмытлан, С.П. Айдышевалан, И.С. Сайфутдиновалан, А.С. Андриевалан, А.А. Ахмадуллиналан, А.И. Валтиевалан, О. Миннибаевалан, А.С. Миннибаевлан, С. Тимирбаевлан, А. Тимирбаевалан, Надежда ден Федор Кунакбаевмытлан, Юлия ден Анжелика Байдугановамытлан эҥертена. Чумырген, каҥашен ыштена гын веле ончыко каен кертына», - палемдыш Л.М. Сайфутдинова.
Ӱшанен кодына, Лапкашор калык, ваш келшен илен, ончыкыжат лекше йодыш ден проблема-влакым решатлаш йӧным муэш.
Новости партнеров