У медпунктым калык шукертак вучен

Кеч-могай ялыште медпункт - калыклан ик эн кӱлешан вер, а фельдшер - тиде нунылан тӱҥ эҥертыш, «вашкеполыш» служба, тазалыкын оролжо. Тымарте ятыр ий ялче-влак медицина полышым налаш тоштемше пу зданийыш коштыныт. Ынде олмешыже ялсовет кудывечыште мотор, кызытсе жаплан келшыше у ФАП волгалт шога. Тушто кабинет-влакым, мебельым, оборудованийым - чылажымат СанПиН нормын йодмашыжлан келшышын, кӱлеш семын йӧнештарыме. Тошто Яшыште у ФАП-ым чоҥаш «Продолжительная и активная жизнь» нацпроектын «Модернизация первичного звена здравоохранения» программыже йӧным ыштен. Республикын районлаштыже пытартыш ийлаште тудлан кӧра ятыр у ФАП-ым почыныт. 

Тысе медпунктышто Тошто, У Яш, Братовщина ялласе калык медицина полышым налеш. Фельдшерлан кумло ий утла кугу опытан, ӱшанле да пашажым чон пыштен шуктышо З.А. Изибаева ышта. Ял калык дене профилактика паша, медицина процедур-влак, вакцинанаций, диспансерный эскерымаш, патронаж да тулеч моло - чылажат Зинаида Алексеевнан ӱмбалныже. Арамлан огыл тудо шукертак верысе калыкын пагалымашыжым сулен. Таче, фельдшерын суапле пашажым аклен, Калтаса райадминистрацийым вуйлатыше Семен Цедилкин Зинаида Изибаевалан районын Чап грамотыжым кучыктен.