+16 °С
Облачно
Ял илыш
19 Июня 2025, 12:00
Кеҥеж - шудым ямдылыме пагыт
Кеҥежым ялыште шудым ямдылыме сомыл ик тӱҥ пашалан шотлалтеш. Ончыч шудо пагыт июльышто тӱҥалын гын, кызыт теве яллаште вольыклан телылан кургым ямдылашат тӱҥалыныт. Июнь покшелне ик жап когартен шинчыше шокшо игече тидлан сай йӧным ыштен.
Авторын фотожо-влак.
Олыкышто огыл, шудым кызытеш шкеныштын пакчалаште да ял тӱрыштӧ солышо, погышо-влакым ужаш лиеш. Утларакшым триммер, мотоблок да трактор дене солат гын, коклаштышт 21-ше курымыштат кидеш савам кучен солышо-влак алят улыт. Эше тыгай сӱрет шинчаш перна: южо ялче-влак пакчалаштышт, пареҥгым да пакчасаскам шындыме кумдыкым иземден, пелыжым «люцерна», «вика» манме шудым ӱдат. Вара кеҥеж гочлан кок-кум гана солен, поген налыт. Пакчасе да олыкысо шудым таҥастараш ок лий, конешне - нуно садак ойыртемалтыт. Но, мо сайже, тора олыкыш коштшаш уке - ышташ шонышылан шудым сурт деч кораҥдеак ямдылаш лиеш. Вӱташте вольык уло гын, конешне. Ынде яллаште тӱкан шолдыра вольыкым ашнышыжат шагалемын - шукыжо шорык, каза дене серлагат. Тӱҥжӧ - шудым солаш, шупшыкташ шкендын техникет лийже. Тиде пашам ятырлан куштылемда. Да, мутат уке, шудым кеҥежым сай игечыште солен-савырен-поген-конден шуктыман, вет тиде пашаште чылажат огыл гын, шукыжо игече деч шога.
Новости партнеров
