+7 °С
Ясно
Ял илыш
6 Ноября 2024, 06:39
«Мемнан селана» программа полшымо дене
Ялыште сомыл тич, шке сурт кокласыжым кажне еҥ шке семынже ыштылеш гын, тӱшка пашажым пырля чумырген веле ворандараш лиеш. Но чылаж годым шке вий дене гына сеҥашат огеш лий, полшен кертше кугыжаныш программа-влаклан эҥерташ верештеш.
Тӱшка пашаш лекше-влак. Р. Минильшинан колтымо фото-влак.
Тыге шукерте огыл Чашка ял калык «Мемнан селана» программа полшымо дене шӱгарла йыр печым уэмден шынден. Ты сомылым тарватен колташ да программыш логалаш манын, тӱрлӧ мероприятийым эртареныт, ялсоветлан (вуйлатышыже Л.Ю. Изиланова) ятыр документым шотыш кондаш логалын.
Тӱшкан ушнаш гын, кеч-могай сомыл ворана.
«Кучылтшаш оксан 10 процентшым калык деч погышна. Чашкаш шочын-кушшо да кызыт тӱрлӧ кундемлаште илыше землякна-влакат чот полшышт. Нефтекамск олаште илыше Е.И. Мазитов 64 тӱжем теҥгем колтыш. Вара тыгак, тӱшкан погынен, профнастил дене шӱгарла йыр печым печышна, кум ий ончыч «Атайсал» программа полшымо дене нӧлтен шындыме изи пӧртым профнастил дене леведна да пӧртӧнчылым ыштышна», - каласкала ял староста Р.Н. Минильшина.
Руфина Николаевна шке ялысе пашаче калыкшым пеш моктен ойлыш. Ты сомылым шукташ полшышо да оксам пуышо кажне еҥлан, Е.И. Мазитовлан, моло спонсор-влаклан газет гоч кугу таум каласаш йодо.
