Калык вий - кугу вий, курыкымат савыра

2023-шо ий Тынбай ял калыклан да ӧрдыж кундемлаште илыше шочшыжо-влаклан кугу шарнымашым кодыш. Ял илышыштына ятыр поро да пайдале пашам шуктымо нерген газетыштат возымо ыле. А шукерте огыл тӱшка вий дене ял пашаште кучылташ кӱлшӧ бульдозер тракторым налын кертмаш калыкна дене уэш да уэш кугешныме кумылым шочыкта.

Тыгай техникын кӱлешлыкшым эше кеҥежымак, Тынбай пӱям пӱялаш ямдылалтме годым шижна. Тудым тӱрлӧ вере кычалмеке, пале лие: ик шагат пашам ыштымыжлан пеш шергын йодыт, да мемнан йырысе яллаште тыгайым муашат йӧсӧ. Кеч ялсоветын балансыштыже тыгай трактор ыле, но пудыргышо манын, вашке гына списатлен «ужатышт». А пӱя ӱмбалсе пашам эше мучашлыме огыл: мландым тӧрлаш, кокымшо арыкым ышташ кӱлеш. Туштат, ял  илыш дене кылдалтше моло пашаланат мландым шӱкен кертше трактор пеш кӱлешан. Тыге адакат, яллан полшаш тыршымыштым да поро кумылыштым ончыктен, йӱдвел кундемыште илыше да пашам ыштыше ялнан шочшыжо-влак, рвезе калык, «Тынбай пӱя» тӱшкаште каҥашымеке, интернет гоч келшыше тракторым кычал муын, окса дене кугун полшышт. Ял калыкат, тӱрлӧ кундемлаште илыше родо-шочшына-влакат ӧрдыжеш ышт код. Чылаже 183 еҥ оксам пуэн але колтен, тыге 522 тӱжем теҥге чумырген.

Владислав Ибашев (Тудо кужу жап колхозышто тыгай трактор дене пашам ыштен.) ден Станислав Янситов Актаныш кундемыш тракторым ончаш миен тольыч. Кӱлеш наре оксам чумырен шуктымеке, Алексей Алкаев ден Владимир Миксонов тудым КамАЗ машина дене кондышт. Бульдозерым Владислав Ибашев ӱмбаке оформитлаш кутырен келшышна. Тракторлан техосмотрым эртарыме, учетыш шогалтыме. Чыла тиде пашам Олег Миксонов моштен виктара. Тудлан полшен шогышо икоян еҥ-влакат ялыштына ятырын улыт. Оксам погымо пашаште Наталья Шамыкаевалан (тудын счет номерышкыже оксам колтымо, эре отчетым ыштен шоген), «Любимый» кевытыште ужалыше-влак Светлана Шамратова ден Валентина Иркабаевалан кугу таум ойлена. 

Чынжымак, тӱшка вий дене мом гына ышташ ок лий - шоныдымо-вучыдымо  пашат куштылгын шукталтеш. Тракторым шке вий дене налме пашашке тыге рӱж ушнышо калыклан кугу деч кугу таум каласыме шуэш. «Поро паша кок ӱмыран» маныт калыкыште, тек тыгак лиеш. Поро кумылым ончыктен да эре полшен шогышо калыкнан илышыже волгыдо да пиалан лийже.