Илыш ял покшелне изи клубышто шолеш

Памашыш мийымем годым ялсовет администраций вуйлатыше Э.М. Иванова ялысе чолга тӱшка дене вашлиймашымат клубыштак  эртараш темлыш. Ончычсо дене таҥастарымаште тӱвыра «полатыштым» ятырлан уэмденыт, чиялтеныт, сӧрастареныт. Изи гынат, тӱрлӧ мероприятий годым калыклан погынаш йӧнан, шокшо, кумыллан каньыле вер. Чыла тидым калыклан полышым пуымо программа почеш ыштеныт. Конешне, тыште клуб пашаеҥ-влак М.Р. Янышева ден Л.И. Сайсанован тыршымыштым, чон пыштен ыштымыштымат палемдыман. «Ынде самырык-влакат клубышко толаш тӱҥальыч», - ойлат нуно. «Ший памаш» ансамбльышт, моло верысе гаяк,  тӱҥ шотышто ийготым погышо ӱдырамаш-влакым ушен шога. А кушто кызыт самырык-влакын ансамбльыштым ужында? Но тыршен ыштыме паша садак могай-гынат лектышым пуа.

Шочмо йылме дене лекше газетлан возалтме нерген мутланымаш кумда  йогыныш лекте. Тӱвыра, йӱла, калык вургем, кызытсе койыш-шоктыш, мом йомдарыме да кузе кеч улыжым арален кодымо шотышто памаш-влак шкеак мутым тарватышт. Икманаш, кутырымаш-каҥашымаш пеш шокшын да пайдалын эртыш.

Нуно ППМИ полшымо дене эше ик пашам шукташ кумылаҥыныт - школ кудывечыште Кугу Ачамланде сар салтакын памятникше шогымо мемориал йырысе вереш мрамор гыч ыштыме плиткым вакшнешт. Тидын шотышто шукерте огыл тӱшка погынымашым эртареныт. Каҥашымашым тарватыше чолга тӱшкан пашажым виктарыме сомылым школ директорын воспитаний паша шотышто алмаштышыже Р.Р. Шайнурова шке ӱмбакыже налын, тушко туныктышо-влакын коллективышт гыч Н.С. Ижбулдина, С.Л. Янсубаева, А.В. Шамсутдинова, Е.И. Валитова да ялсовет администрацийын пашажым виктарыше Ж.Ю. Васильева ушненыт.

Э.М. Иванова шкежат ӱмыржӧ мучко туныктышылан ыштен, тений шыжым ял калык тудлан верысе администрацийым вуйлаташ ӱшанен. Кушто школ, клуб, ял калык, пырля ушнен, келшен пашам ыштат, тушто кеч-кунамат шонымашышкышт шуын кертыт.