Радий Хабиров Узбекистаныш миен

Погынымаште палемденыт: эртыше идалыкын лектышыже почеш, Россий ден Узбекистан коклаште товарооборот 5 процентлан кугемын - лу миллиард долларым эртен. Радий Хабиров ден Жамшид Ходжаев Башкортостан ден Узбекистанын регионжо-влак коклаште вашкылым вияҥдыме шотышто «дорожный картеш» кидпалыштым пыштеныт. Тушто промышленный коопераций ден инвестиций, ял озанлык да пищевой промышленность, туризм, образований, тӱвыра да моло сферысе йодыш-влакым тарватеныт. 

Ташкентыште Радий Хабиров тыгак Узбекистанын Президентше Шавкат Мирзиёев дене вашлийын. Нуно тӱрлӧ проектым илышыш пырля шыҥдарыме, образований, наука аланыште вашкылым ыштыме, регион-влак коклаште кылым пеҥгыдемдыме нерген мутланеныт. Кугу проект-влак коклаште - Ташкент областьыште «Бекабад» технопаркым (Тушто Башкортостанысе компаний-влак пашам ышташ тӱҥалыт.) почмаш, а мемнан дене чоҥаш палемдыме «Толпар» технопаркыште Узбекистанын компанийже-влак резидент лийыт. Ял озанлыкыште вольыкым ончымо да пакчасаскам куштымо проект-влаклан тӱткышым ойырат. Уфимский районышто Узбекистанын компанийже-влак дене пырля оптово-распределительный рӱдерым ыштат. 

Ташкентыште Башкортостан Вуйлык тыгак Ислам цивилизацийын у рӱдержым ончен савырнен. «Икте-весынан паша опытым шымлаш тиде рӱдер ден мемнан республикысе музей-влак коклаште соглашенийым ышташ шонена», - каласен Радий Хабиров. Тыгак мемнан кундемыште Куснен коштшо цивилизаций-влакын евразийский музейыштым ыштыме сомылым пырля шукташ палемдыме.