27 сентябрь - Туризмын тӱнямбал кечыже. Ташкент - Самарканд - Бухара

Узбекистаныште игечыжат, мемнам вучымо семын, пеш чот ыш пелте (23-27 градус шокшым ме чытена), йӱрат ыш йӱр, ик йӱдым веле пычырик шавалтыш, а шагат жапше Башкортостанысе гаяк ыле. Садлан кужу корно деч моло йӧсылыкым шижаш ыш логал. Группыштына 28 турист, кок водитель да мемнам ужатен коштшо еҥ - чылаже 31-н лийынна. 

Узбекистаныш комфортабельный автобус дене кок сутка кайыман. Корнышто Башкортостаным, Оренбург областьым да эн шукыжо Казахстан мландым эртышна. Тӱрлӧ корно дене каяш вереште. Кызыт нуным тӧрлен да уэмден шогымым, у корно-влакым чоҥымым ончен эртышна. Ме пеш ару отель-влакыште кок веран номерлаште илышна. Турын программышкыже эр кочкышым - «швед ӱстелым» - пуртымо ыле. Тувел кундемыште куштымо арбузым, виноградым, дыньым, инжирым да моло емыжымат тамлен ончышна. Узбекистаныште турист-влакым пеш порын вашлийын моштат. Тушко Европысо, Азийысе элла гыч ятыр турист коштеш. Мемнан мийыме годым руш-влакат ятыр койыч.

Икте-весым умылымо шотышто нимогай нелылык уке. Отельыште, рестораныште, кевытыште, пазарыште да моло вере Россий гыч мийыше турист-влак дене рушла мутланат. Мемнам кум олаштыжат руш йылмым сайын палыше гид-влак вашлийыч.  

Узбекистаныш мияш россиян-влаклан виза ок кӱл. Документ-влак гыч загранпаспортым гына ончыктыман. Элын официальный валютыжо - узбек сум. Границыште мемнан оксам сумлан вашталтыман. Российысе «Мир» банк карта дене нигуштат тӱлаш огеш лий.

Ме Узбекистанын рӱдолашкыже кас велеш гына миен шуна. «Ташкент» отельыш вераҥмек, «Кас Ташкент» экскурсийыш кайышна. Ташкент-сити у районышто коштын савырнышна, «мурышо фонтан-влак» шоум ончышна. Эрлашыжым гид олаште обзорный экскурсийым эртарыш.1966 ий 26 апрельыште мланде чот чытырналтме олмышто шогалтыме «Мужество» монументым, Независимость площадьым, Амир Тимурын (Тамерланын) сквержым да моло исторический верлам ончышна. 

Ташкентыште «Беш казан» плов рӱдерыште кечывал кочкышым ыштышна. Тудым турын программышкыже пуртеныт ыле. Моло олаштыже группыналан гид ончылгочак рестораныште ӱстел-влакым бронироватлен. Кастене шке семын олам ончен кошташ жапым пуэныт, кафелаштат лийна.

Самаркандыште кумдан чапланыше Гур-Эмир мавзолейым, Регистан площадьым, Улугбекын медресежым, обсерваторийжым, Биби-Ханым мечетьым ончыктышт. Самаркандысе Сиабский (Эрвел) пазарыште кӧстенечлан тӱрлӧ пӱкшым, халвам, щербетым, сувенир-влакым нална. Эше тыште мемнам ковер фабрикыш намийышт. Тудын озаже, афганец, мыланна мыскара йӧре пеш оҥай экскурсийым эртарыш. Шке кид дене куымо ковер-влак уло тӱня мучко палыме улыт. 

Эн чотшо мыланем Бухара келшыш. Изирак олаште Арк крепостьым, Пои Калян комплексный ансамбльым, Бахоуддин Накшбандидын мемориал комплексшым, Саманидмытын мавзолейыштым да моло памятникым ончен, шерет ок тем. 

Узбекистан - мотор эл. Тудын моторлыкшо нерген мут дене гына каласкален мошташат огеш лий. Тушто илыше калыклан шуко нелылыкым чыташ логалын гынат, шке историйжым да тӱвыражым пӧртылтен да арален коден кертын. 

Тыгай кужу корныш каяш тарванымемлан пырчат ом ӧкынӧ. Узбекистан мыйым шинчам йымыктарыше кечыже, мотор архитектурыжо, унам вашлийын моштымыжо да сатун акше денат куандарыш. А кушто эше электрокарыш шинчын  кудалышташ лиеш? Пазар гыч отель марте электрокар дене олам ончен кайыме  гына мом шога!

Узбекистаным шарнен илаш да кӧстенечлан манын, мый тушеч шокшо кечеш коштымо тутло сухофруктым, пӱкшым, специйым да сӧрал шун фигур-влакым кондышым.