«Вияш линий» могай йодышым тарватен?

Элын Президентше обязательный вакцинацийым кӱлешанлан ок шотло. Но регионлаште инфекций кумдан шарлаш тӱҥалеш гын, тушто посна категорий граждан-влаклан тидым ышташ правашт улмым рашемден. Тыгай ошкыл локдаун лийын кертме деч утарен кодаш полшышаш. Тыгак эпидемийым вакцинаций полшымо дене гына чактараш лийме, медотвод улмо годым вакцинаций деч кораҥмылан паша гыч увольненийым законлан ваштарешлыше улмыжым палемден. В.В. Путин пашадымылыкым шагалемдыме шотышто «Экономикым вияҥдаш кӱлеш, калык сай пашадарым налшаш» манын каласен. «Правительствын вице-премьерже-влак Дальний Восток да Арктика дене веле огыл, моло посна территорий-влак дене вашкылым ыштымыланат вуйын шогаш тӱҥалыт», - каласен тудо. Илалше-влак да банк мошенничество шотышто Рӱдӧ банк ден правоохранительный орган-влак коклаште вашкылым пеҥгыдемдаш да законодательствым саемдаш кӱлмым палемден. «Вияш линий» годым калык кундемлаште кум-шым ияш икшывылан окса полышым тӱлымӧ, футбол, хоккей спортышто кадр нерген шоналташ кӱлмӧ, тӱнямбал политика, Интернетысе соцлаштык-влакым блокироватлен кертме, самырык-влаклан тӱвыра учрежденийлаш кошташ билет акым компенсироватлыше программым ыштыме, тугок газификаций, коронавирус дене черланыше-влакын реабилитацийышт, льготный ипотека, шокшо игече шогымылан кӧра шурнылан эҥгек лийме да мелиораций кӱлмӧ дене кылдалтше йодыш-влакымат тарватеныт. Эл Вуйлык Российыште ак кушмын амалжым тӱнямбал ситуаций, прозводствын сокращенийже да паша вер шагалемме, а внутренний туризмлан ак кӱзымым йот эл-влакын чекышт петырналтме дене умылтарен.