Тӱнямбал выставка пашам ышташ тӱҥалеш

VI Тӱнямбал фольклориада жапыште Уфа оласе Салават Юлаев лӱмеш площадьыште «Фольклориадын шӱмжӧ» промысел да ремесло-влакын кугу тӱнямбал выставкышт пашам ышташ тӱҥалеш, увертара БР Тӱвыра министерство.

Тудым почмаште 4 июльышто 19 эл гыч 40 ремесленник ушна. Выставкыш Башкортостанын районлаже да Уфа ола гычат 39 предприятий, организаций да индивидуальный предприниматель сувенир сатужым намия. Тидлан кидмастар-влаклан тушто стилизоватлыме шатер да стеллаж-влакым вераҥдат. Коверым кумо, тасмаште художественный роспись да моло мастер-класс-влак эрташ тӱҥалыт. Уна-влакат республикысе калыклан шке тӱвырашт да йӱлашт нерген каласкалат. Тӱнямбал выставка 10 июль марте шуйна.