Ялыш тазалыкым тергыше «поезд» толын

А «Тазалык поезд» Ардашыш тунам, 22 августышто, чынак миен. Тидын нерген ончылгоч шарыме увертарымаш гоч пален налмеке, шке тазалыкышт верч азапланыше еҥ-влак шукын погыненыт. Тӱҥ шотышто кугурак ийготан пенсионер-влак миеныт - вес гана кунам эше тыгай йӧн лектеш? Тазалыкым тугок тергыше медицина пашаеҥ-влак ялышкетак толыт гын, молан тидден пайдаланаш огыл? Райрӱдыш але торарак кундемысе эмлымверыш ончылгоч сералтме почеш коштмо гай огыл вет. Икте-весышт дене тыге мутланен, «Тазалык рӱдер» манме икмыняр кугу автомашина воктен ардаш-влак черетыштым вучен шогылтыныт.

«Тазалык поездын» бригадыжым тӱрлӧ вер гыч чумырымо. Флюорографийым Нефтекамск гыч мийыше специалист-влак эртареныт, кардиологым Уфа гыч колтеныт, а ЭКГ шымлымашым, тыгак шинчан давленийжым тергымашым да маммографын пашажым Бирск оласе больницын специалистше да лаборантше-влак шуктеныт. Нунын орван (передвижной) лабораторийыштым «КамАЗ» автомашина негызеш ыштыме. Эше Мишкан села гыч посна машина дене моло специалист-влакат миеныт. Икманаш, тазалыкым эскерыше кӱлешан (дефицитный) специалист-влакын толын лекмышт - верысе калыклан моткоч кугу куан!

Но… тиде «поездше» тазалыкшым тергаш шонышо чыла еҥын кумылжым шуктен огеш керт улмаш. 3-4 шагат жапыште чыла специалистымат эртен кертдымыжат лийын, а кардиолог гын черетым вучен шогышо-влак гыч ужашыжым веле ончен. «Молан ончычак мыняр еҥым ончымо чотым увертарен огытыл? Ме ӱшанен толынна, вученна, а  черетыште 2-3 шагатым йомдарен шогымо деч вара мӧҥгеш савырен колтеныт. Каласат гын, огына шого ыле…» - ӧпкеленыт шоҥгыеҥ-влак. Тояш эҥертен, мӧҥгеш ошкылшыжым ончен шогаш поснак жал ыле. 

Ардашыш толшо медицина пашаеҥ-влак калык шуко погынымылан шкештат изиш ӧрыныт. «Моло вере шагалрак толыт ыле», - маныт. Но вет чыла вере икгай лийын огеш керт. Ик могырым, ял кугу, эше ты сельсоветыш пурышо моло ялла гычат толын кертыныт. Вес могырым, калыкат тӱрлӧ: чыла вереат шке тазалыкышт верч тыге огыт ойгырто дыр… Але тыгай полышлан огыт ӱшане. «Тазалык поездын» специалистше-влак деч «Кечеш мыняр еҥым приниматлаш кӱлмым Тазалыкым аралыме министерство пеҥгыдемда але шке семын верыште ончеда?» манын йодмемлан ялыш толшо бригадын ик специалистшат раш вашмутым ыш пу.

Мутат уке, яллашке медицина специалист-влакын лектын коштмышт - пешат кӱлешан сомыл. Нунымат умылаш лиеш: тӱҥ паша верым коден, калыкын тазалыкшым эскерыме ешартыш сомылым шукташ куштылго огыл. Но кызытсе саманыште вес семын огешат лий, очыни. Тынар автомашинам, специалистым тӱрлӧ верлаш колтылаш роскотшат шагал огыл кая. Можыч, кугурак илемлаште паша радамым вес семынрак чоҥыман да шукырак жапым ойырыман?

Радий Хабиров 18 сентября 2023 года:

- Благодарю всех медиков, которые работали в составе выездных бригад. И огромное спасибо главам районов, на местах создавались все возможные условия. Мы продлим «поезда здоровья» и дальше. Возможность обследоваться и получить качественную медицинскую помощь должна быть у каждого жителя республики, независимо от того, где он живет.