Нефтекамскыште Самырык-влакын кечышт

Нефтекамск самырык олалан шотлалтеш, да самырык тукымланат тыште поснак кугу тӱткышым ойырат. Тиде пайремым олаште теҥгечак моткоч кумдан палемдышт. Тыште кечыгут оҥай мероприятий: “Торпедо” стадионышто медиафутбол, баскетбол турнир, йога дене занятий, “Атмосфера” уремысе куштымаш фестиваль, Азык Фест гастрономий пайрем - эртеныт, тӱрлӧ интерактивный площадка пашам ыштен. А кастене каныме паркыште “Живая волна” рок-фестиваль шке йырже самырык-влакым веле огыл, рок-музыкым колышташ йӧратыше кугурак тукымымат чумырен. Погынышо калыкым усталыкышт дене “Третья планета”, Bezbysta, “Roswell 47”, “Добрый Рокер”, “POLTORA VORONA”, Тони Мак, “Бонд с кнопкой” да моло рок-группа куандареныт.