Военнообязанный-влакын единый реестрыштым ыштат

Закон почеш воинский учет реестрым Правительствын  пеҥгыдемдыме радам дене военкомат-влак ямдылат. Документыште граждан-влаклан кагаз повестка-влак деч посна эше электрон уверым колтылаш тӱҥалме нерген возымо. Военнообязанный еҥ кагаз повесткым кидшым пыштен налеш, тудым тыгак уведомлениян заказной серыш дене колтен кертыт. Электрон повесткым «Госуслуги» порталысе личный кабинетеш вераҥдат гын, тудо кучыктымылан шотлалтеш.

Повесткым налме деч вара 20 кече коклаште военкоматыш мийыдыме граждан-влакын транспортым виктарыме праваштым, вер гыч верыш кусараш лийдыме погым ужалыме-налме, кредитым налме, ИП-м регистрироватлыме йӧныштым шыгыремден, а призыв почеш служитлаш кайышаш-влаклан, повесткым налме деч вара военкоматыш мийымеш, вес элыш каяш чарен кертыт.

РФ Кугыжаныш Думын оборона шотышто комитетшым вуйлатыше Андрей Картаполовын мутшо почеш, единый базым ыштымаш воинский учетын данныйже-влакым рашемдыме годым еҥ-влакым военкоматыш шуэнрак ӱжыкташ йӧным ышта. Южгунамже, мутлан, икымше гана учетыш шогалташ але запасыш колташ, мийымыштат ок кӱл.