Кӧлан тунемаш?

Колледжыште тӱҥалтыш школлан туныктышо, йочасадлан воспитатель-влакым да эше социальный пашаеҥым, веб-сайт разработчик-влакым ямдылат. Тунемаш пураш йодмашым 15 август марте налыт. Июль покшелнак «Информационные системы и программирование» специальностьлан ик верлан кум еҥ таҥаса ыле, кызытат йодмашым пуышо ӱдыр-рвезе-влак улыт. «Дошкольное образование», «Преподавание в начальных классах» специальностьлан конкурс уло - ик верыш кок абитуриент дене. А теве «Коррекционная педагогика в начальном образовании», «Специальное дошкольное образование» да «Социальная работа» специальностьлан йодмашым пуаш кумылан ӱдыр-рвезе шагал коеш. Тиде группа-влак эше тич темынат огытыл. Мутат уке, тыгай специальностьлан тунемше еҥ ончыкыжым психолого-медико-педагогический комиссийын справкыже улман йоча-влак дене пашам ыштышаш. А тыгай йоча (ребёнок с ограниченными возможностями здоровья) йочасадыште да школышто утыр шукемеш. Молан? Тымарте ни врач, ни туныктышо-влак эше раш вашмутым муын огытыл. Ала экологий, ала прогрессын вияҥмыже зияным ыштат, пале огыл. Туге гынат тыгай икшыве-влакым айдеме коклаште илаш туныктыман, сандене педагогический колледж-влак нунылан специалист-влакым ямдылаш тореш огытыл, но тунемаш кумылан самырык еҥ ала-молан шагалрак. Кеч нунын тыглай воспитательын да туныктышын деч паша кечышт кӱчыкрак, пашадарышт кугурак да отпускыштат кужурак. Изи конкурсан специальностьлан йодмашым пуаш да ончыкыжым паша веран лияш але кугу конкурсан «престижный» манме специальностьлан тунемаш пураш тыршаш да варажым пашадыме лияш? Самырык ӱдыр-рвезе-влаклан тидын нергенат шоналташ уто огыл, очыни.