Радий Хабиров тӱрлӧ эл-влакын делегацийышт дене вашлийын.
«Вес элласе тӱҥ экономический партнерна - Китай Калык Республика, тудын дене сатусавыртышна 25 процентыш шуэш. Тудым умбакыжат кугемден кертына», - рашемден Радий Хабиров. Тиде гана Китай Калык Республикысе Ганьсу провинцийын Калык правительствыжын Йотэл паша канцелярийжым вуйлатыше Ганьсу Чжао Цзюньын вуйлатыме делегаций дене вашлиймаште умбакыжат вашкылым вияҥдыме шотышто кутырен келшеныт. Чылаже форумышто 103 млрд теҥгелан 50 соглашенийым ыштыме.
Радий Хабировын мутшо почеш, Сибай ола да лишнырак верланыше район-влак инвестицийлан келшыше улыт. Тыште тӱрлӧ экономика рӱдер-влак, ты шотыштак промышленный да ял озанлык район-влак, верланеныт. Тиде форум инвестор-влакым ты кундем дене кумданрак палдараш, а тӱвыра программыже кундемыште туризмым вияҥдаш йӧным ыштат.
«Зауралье» инвестиционный форумым Абзелил районышто Сабантуй дене мучашленыт. Тушто 2 тӱжем наре участник да 10 тӱжем наре уна лийын.