Ӱярня - яллаште кумдан палемдыме калык пайрем

Ушменыште калык йӱла пайрем эре тыге веселан эрта. Ял кугу, но тыште клубат, школат уке. Туге гынат пайремым лӱмжылан гына (клуб але библиотека пашаеҥ-влак деч отчетым йодмылан) огына тарвате, чыла шот денат пырля келыштарен ыштена. Клубым да школым петырымыштлан ятыр ий лиеш. Кызыт, ялысе тӱвыра полатым лишыл жапыште чоҥен шогалташ манын, пашалан чолган пижынна, проектым ыштыктенна. Теве Ӱярнямат ялнан эн мотор верыштыже - ончычсо школ воктенысе куэрыште - пеш чаплын эртарен колтышна. Кеч-могай мер пашам тарватыме годым эн ончычак Аркадий Кунакбаев, Юрий Акитаров, Геннадий Ильин уло кумылын полшаш ушнат, а чолга пашаче тӱшкана чылаже 15 еҥ гыч шога.

Телым ужатыме пайремыш уло ял дене ик кугу еш гай ушнышна. Изижге-кугужге модна, мурышна, куштышна, таҥасышна, икте-весым воштылтышна… Тулотышто пучымышым шолтышна, мелнам кӱэштна, самовар гыч шокшо чайым йӱктышна, а эше ялчына-влак пеленышт пеш шуко кӧстенечым конденыт ыле. Чыла унам тугок сийлышна. Оксала налаш шонышо-влак изиш ӧрычат чай…  Ялыште ожно Ӱярням кузе эртареныт, меат тугак ыштенна - тыште нимогай коммерческий буфет лийын огыл. Марий йӱла почеш уна-влакым поро кумыл дене сийлат, кочкышым оксала огыт ужале. Пеш кугу тау Ӱярням эртараш полшышо ялчем-влаклан, пайремыш рӱжге ушнышо чыла калыклан. Йоча ден самырык-влакын погынен толмышт поснак куандара. Лач тыгай годым ял калыкын келшен илымыже, пашам ыштен да канен моштымыжо раш коеш. Мотор куэрыштына ончыкыжат погынаш тӱҥалына!