Врач-влаклан ешартыш шийвундым тӱлаш тӱҥалыт

Тыгай пунчалым Россий Президент Владимир Путин пеҥгыдемден. Тиде сомыллан шушаш ийыште 152,4 миллиард теҥге шийвундым ойырат. Россий Правительствын вице-премьерже Т. Голикован увертарымыж почеш, райрӱдысӧ да районысо больницылаште пашам ыштыше врач-влак тылзе еда 18,5 тӱжем, первичный звеношто тыршыше врач-влак 14,5 тӱжем, вашкеполышын врачше-влак 11,5 тӱжем теҥге ешартыш оксам налаш тӱҥалыт.  

Районысо, тыгак рӱдӧ райбольницыште ыштыше кокла медперсоналлан надбавкын кугытшо 8 тӱжем теҥге, поликлиникыште, ФАП-ыште, врачебный амбулаторийыште тыршыше кокла медперсоналлан 6,5 тӱжем, вашкеполышын фельдшерже ден медшӱжарже-влаклан 7 тӱжем, рӱдӧ райбольницын первичный звеноштыжо ыштыше изирак медперсоналлан 4 тӱжем, вашкеполышын вызовым приниматлыше фельдшерже-влаклан 4,5 тӱжем теҥге лиеш.