Август тӱҥалтыш гыч пашам ыштыше пенсионер-влаклан пенсийым кугемдат. Мынярылан ешарымын кугытшо кажне еҥын тӱрлӧ лиеш. Тудо эртыше ийыште работодательын тӱлымӧ страховой взносын чумыр кугытшо деч шога. Ешарыме окса кум пенсионный балл деч кугу лийшаш огыл (Тений июнь гыч ик пенсионный балл 118,1 теҥгеш шуэш, тугеже пенсийым эн шукыжо 354 теҥгелан ешарат.). Тидлан йодмашым пуымо ок кӱл, перерасчет автоматически ышталтеш. Тыгак кеҥежын пытартыш тылзыштыже 80 ийым темыше россиян-влакын пенсийыштын фиксированный выплатыштым кок пачаш кугемдат - тудо 14,4 тӱжем теҥге лиеш. Ушештарымаш: страховой пенсийын кугытшо фиксированный выплата (чылалан икгай - 7220 теҥгеат 74 ыр) да страховой ужаш (кажне еҥын ойыртемалтше - погымо пенсионный балл да страховой стаж дене кылдалтын) гыч шога.
Ынде самозанятый граждан-влак налоговый органлаш учетыш «Госуслуги» портал гоч шогал кертыт. Учетыш шогалме нерген данный-влакым налоговый органлаш оператор шке пуа. Тиде легально пашам ыштыше самозанятый-влакын чотыштым шукемдаш полшышаш. Ончыч тиде процедурым «Мой налог» приложений да ФНС-ын сайтшын личный кабинетше гыч веле ышташ лийын.
ЛНР ден ДНР кундемла гыч Россий Федерацийыш толшо да тыште илаш жаплан пуымо удостоверенийым налдыме граждан-влакын 17 августышто элыште лияш правам пуышо разрешенийыштын срокшо лекшаш лийын. Тиде жапым шуяш пунчалме. Ынде кӧн тидлан разрешенийым пуышо документше уке, нуным административный мутым кучаш огыт шогалте. Нуно умбакыжат Российыште кодын кертыт.
Сакырлан, рапс ден кечшудо нӧшмылан ак кугеммылан кӧра тений мартыште Россий Правительство нине сатум жаплан экспортыш колташ чарен ыле. 31 август гыч тиде чаракым кораҥдыме лиеш.
«Известия» газетын материалже негызеш Л. ШАВАЛИЕВА ямдылен.