Карантиныш огыт колто

Тыгак коронавирус дене шым кече утла черланен кийыше-влакын больничныйыштым отрицательный тест деч поснак петыраш тӱҥалыт. А тылеч шагалрак эмлалтше-влаклан больничныйым петыраш отрицательный тест кӱлеш. 

Роспотребнадзор вуйлатыше Анна Попован мутшо почеш, омикрон шарлымылан кӧра коронавирус сезонный ОРВИ гайыш савырна. Но омикрон пеш писын шарла да чӱчкыдын нимогай симптом деч посна эрта.

Тазалыкым аралыме министерстве респираторный черын гай пале улмо годым 122 номер дене «шокшо линийыш» але илыме верысе поликлиникын колл-рӱдерышкыже йыҥгырташ темла. Врач дене дистанционно мутланыме деч вара, ПЦР-тестым налдеак, черле еҥлан электронный больничныйым почаш йӧным ыштыме. Шым кече гыч тӧрлана гын, больничныйым тыгак ПЦР-тест деч посна дистанционно петыраш лиеш. Ок тӧрлане гын, туддек врачым колтат, ковидлан анализым налыт да умбакыже эмлат.

Тыге врач-влакын чот черланыше-влак дек кошташ жапышт утларак кодеш, да поликлиника-влаклан пашам ышташ йӧнанрак лиеш, маныт. Тыгай паша радам 15 март марте шуйна, воза «Российский газет».