Калыклан процент ставкыже 5 процент деч кугу ок лий, кодшо ужашыжым РФ Правительство субсидий дене петыраш сӧра. Ноябрь мучаште премьер-министр Дмитрий Медведев банк-влакын нине потребительский кредитла гыч налын шуктыдымо парышыштым пӧртылтымӧ правилым пеҥгыдемден, воза «Российский газет».
Тыге, 1 январь гыч тыгай сомылым шукташ келшыше банк-влак граждан-влаклан кредитым пуэдаш тӱҥалыт. Тиде оксам пӧртыш электричествым, газым пурташ, канализацийым ышташ, подряд договор почеш пӧртым ачалаш кучылташ лиеш. Еҥ-влаклан тӱҥ шотышто 250 тӱжем теҥге, Ленинград областьыште да Дальний Востокысо кундемлаште илыше-влаклан 300 тӱжем теҥге марте пуат.