Эл ончылно шке порысым чеслын шуктыман

Ӱжмӧ уна-влак рвезе-влаклан ончыкылык службылан ямдылалташ полшышо шуко поро тыланымашым ойлышт. Нефтекамск оласе резерв составын призывной комиссийжым вуйлатыше Н.Н. Шаяхметов мемнан элын геройло историйже гыч суапле лаштыклажым ушештарыш. Нефтекамск, Агидель ола-влакын да Краснокам районын военный комиссарышт В.С. Анисимов эл вуйлык-влакын тыршымыштлан кӧра уэмдыме да вияҥдыме Вооруженный вий радамыште служитлымын ойыртемже нерген каласкалыш, самырык-влакым залыште шинчыше Кугу Отечественный сарын да локальный сар-влакын ветеранышт гай чолга лияш ӱжӧ.

Сугынь шомак коклаште «Арт-данс», «Версаль» да моло коллектив-влак военный да калык куштымаш-влакым ончыктышт, Сабина Давлетханова чонеш логалше муро-влакым йоҥгалтарыш. Тидыже призывник-влаклан, эллан служитлен, мом аралаш кӱлмымат раш ончыктыш - мемнан йӱланам, тӱвыранам, кугезына-влакын мландыштым, моторлыкым, Россий калык-влакын эрыкан илышыштым.

Каласыман, тенийсе шыже призыв годым Нефтекамск, Агидель ола-влакын да Краснокам районын военный комиссариатышт 21 октябрьыште 20, 24 октябрьыште 9 еҥым элым аралаш колтен, а чылаже 158 рвезе кайышаш.