Пелед, тӱзлане, шочмо кундемна!

«Ромашка» йочасадыштына национальный образованийлан кугу тӱткыш ойыралтеш. Тыште краеведений тоштер пашам ышта. Йочасадыште тыгак Р.Х. Гасанован ямдылыме «Кугезе мланде» ешартыш образованийым пуышо программа почеш «Мыйын шочмо кундемем» краеведений кружокым эртарена. Тушто йоча-влак башкир йылмымат тунемыт. Шошым «Ромашка» йочасадысе педагог-влак тиде авторын эртарыме семинарышкат миеныт ыле. Краеведений кружок изи ньога-влаклан патриотизм шӱлышеш кушкаш йӧным ышта, йоча-влакым шочмо йылмым тунемаш кумылаҥда, шочмо кундемын историйжым, тӱвыражым, Башкортостаныште илыше калыкын йӱлажым шымлаш кумылаҥда.

Тиде кечылаште ме йочасадыште Башкортостан Республикылан 100 ий теммылан, калык поэт Мустай Каримын 100 ияш лӱмгечыжлан да оласе Башкир тӱвыра кече-влаклан пӧлеклалтше оҥай пайремым эртарышна. Мероприятийыште йоча-влак кундемыште илыше башкир да моло калыкын историйышт, тӱвырашт, илыш-йӱлашт нерген шинчымашыштым пойдарышт. Тыгак «Шочмо кундемем да шочмо олам» проект почеш викториным, лудшо-влакын конкурсыштым - икманаш, тематике шот дене республикын кечыжлан лӱмлалтше пайремлан поян арням эртарышна. Ӱдыр-рвезе-влак уло кумылын Мустай Каримын шочмо кундемлан пӧлеклалтше почеламутшо-влакым каласкалышт, Шочмо Эл нерген патриотизм шӱлышан муро-влакым йоҥгалтарышт, куштымашым ямдылышт, тӱрлӧ калык модыш дене модыч. Пайрем сӧралын эртыш. Башкортостанын историйжым ме шарнена, аклена, тачысе кечыж дене кугешнена! Ончыкыжымат пелед, тӱзлане, шочмо кундемна!