Республикын кечыжым кузе пайремлена?

Пайрем республикынан чыла олала ден районлажым авалта. Ты кечылаште ятыр культурно-массовый, спорт мероприятий, экологий акций, ялозанлык ярмиҥга-влак лийыт, социально-значимый объект ден учрежденийлам почыт. Официальный торжественный кас годым кӱкшӧ лектышыш шушо пашаеҥ-влаклан тӱрлӧ наградым кучыктат.

Республикысе образований министерство Башкортостанын Гимнжым мурымо флешмобым, 9 октябрьыште школлаште «Башкортостан: еҥ да событий-влак» класс шагатым эртарат. 20 сентябрь гыч 10 октябрь марте «Республикем моктен мурем» сочинений да эссе конкурслан жапым ойыреныт. 8 октябрьыште «Торатау» конгресс-холлышто Башкортостан Республикын 100 ияш лӱмгечыжлан да Башкортостанын калык поэтше Мустай Каримын шочмыжлан 100 ий теммылан лӱмдымӧ «Мустай лудмаш» регион-влак кокласе научно-практический конференцийым эртарат. 10 октябрьыште чыла библиотекылаште «Башкортостан нерген почеламутым лудына» флешмобым тарватат.

10 октябрьыште Уфаште «Башкортостан» кугыжаныш концерт залыште «Икымше республика» пайрем заседаний, искусство мастар-влакын концертышт лийыт. 11 октябрьыште Шайхзада Бабичын да Салават Юлаевын памятникышт воктек пеледыш аршашым пыштат. Пайрем кечын Салават Юлаев площадьыште да «Торатау» конгресс-холл воктенсе амфитеатрыште калыклан каналташ йӧным ыштат. БСТ телеканалын вияш эфирыштыже Башкортостанын Гимнжым мурат.

Ты кечынак «Мурышо ял!» республикысе вокал усталык конкурс тӱҥалтышым налеш. Тудо 2020 ий 10 октябрь марте шуйна. Музей-влак калыкым «Виш омса» кече дене вашлийыт.

Республикын кечыже концерт, фейерверк да музыкальный лазер шоу дене мучашлалтеш.