Республикыште «Ужар Башкирий» акций эрта

Таче республикыштына «Ужар Башкирий» акций эрта. Тушко чыла ола ден район ушненыт. Нефтекамск олаште чыла кумылан еҥ 9 шагат эрдене «Октябрь» кинотеатр ончылан погынен. Ты кечылан шуктышаш пашам ончылгоч рашемдыме. Ленин уремыште пистым, Магистральный уремыште 200 наре куэм да лиственницым, Дорожный уремыште 350 наре куэм шындат. Управляющий компаний-влак пӧрт-влак йыр пушеҥге ден вондерлам шындылыт.

Тыгодым йыр вер-шӧрым тӱзатыме пашат умбакыже шуйна: шӱкшакым погат, бордюрым чиялтат, пушеҥге укшлам пӱчкедат, йоча площадкылам шотыш кондат.