Актыганыште музиканым шоктеныт

Ямле шошо кастене, апрель тӱҥалтыште, Калтаса районысо Актыган ял клубышто Тошто Яш ялсоветын музиканчышт гармоньчо-влак фестивальыш чумыргеныт. Семмастар-влакын пайремыште ончаш мийыше калыкым вич гармоньчо - Тошто Яш гыч Герман Матвеев, Актыган ял гыч Владислав ден Геннадий Юмаевмыт, Алексей Арсентьев да Олег Кугубаев - куандареныт. Кажне музиканче шке усталыкше дене ойыртемалтын, калыкын кумылжым савыраш тыршен, садлан пайремыште нигӧмат ойырен палемден огытыл - чыла гармоньчылан шарнаш кодшо пӧлекым кучыктеныт. Башкортостан Республикылан 100 ий теммылан лӱмлалтше фестивальым муро, куштымаш, мыскара сценка дене Тошто Яш ден Актыган тӱвыра пӧрт-влакын усталык коллективышт сӧрастарен.