Мыскара дене пырля веселарак

1 апрельым Воштылчык кечылан шотлат. Тиде кечын еҥ-влак чӱчкыдын мыскарам ыштылыт да шыргыжалаш амалым муыт. Чынжымак вет, мыскара дене пырля илашат веселарак. Садланак, очыни, лудшына-влак газетыште серьезный темым тарватыме дене пырля «куштылгырак», лудын лектын, каналташ лийшашлык материал-влакымат вучат.

Можо поснак куандара, илышыштак тыгай мыскарам «комдо тич» верештше у автор-влакат лектын шогат. Кодшо ийлаште Краснокам район Ӱлыл Такия ялыште илыше Евгений АПТУКОВЫН ончалтышыже «пӱсырак» лиймыла чучо. Илышыштак ужмо-колмо ятыр мыскаражым лудшына-влак шкеак аклен кертыч. Воштылчык кече лӱмеш ий еда эртарыме мыскараче-влакын конкурсышто сеҥымылан ШИЙ ПЕРАМАТ тений тудлан кучыктена.