Чодырашке - сий дене

Телылан мемнан кундемеш кодшо кайык-влак йӱштӧ деч огыт лӱд. Туге гынат кеч-могай чонанлан идалыкын тиде жапшым илен лекташ йӧсӧ. Еҥ-влак деч полышым йодын огыл мо, йӱштӧ тӱҥалмек, киса, шогертен да моло кайык айдеме илем воктек чоҥештен толыт? Сандене кажне телым республикыште «Кормушка» экологий акцийым эртарат.

Нефтекамск оласе «Дельфин» йочасадын кугу ешыже идалык еда тиде пайдале мероприятийыш уло кумылын ушна. Теният ӧрдыжеш ышт код. Теле тӱҥалтыштак йочасадыш коштшо ӱдыр-рвезе-влак ава-ачашт, кова-кочашт, воспитательышт полшымо дене тӱрлӧ кормушкым ямдылышт да йочасад кудывечыште кушшо пушеҥге укшлаш вераҥдышт. Кормушкылаште кочкыш ынже пыте манын, йоча-влак шкеак тыршат - мӧҥгышт гыч кинде пудыргым, шӱрашым, кечшудо нӧшмым, шыдаҥым кондат. «Шулдыран уна-влак» икшыве-влакын тӱнӧ модмышт годым гына «ӱстелышт» деч мӱндыркырак чоҥештен каят. Йӱк-йӱанышт лыплана веле - кочкышым чӱҥгаш толынат шуыт.

Каныш кече пайдалын эртыш. Кузе уке гын? Шӱдӧ гана колмеш, йоча шке шинчаж дене ужеш але шке кизаж дене иктаж-мом ыштен онча да паша лектышыжым ужеш гын, илыш умылымашыже, йырым-йырысе пӱртӱс нерген шинчымашыже ала-мыняр пачаш пойдаралтеш. Кажне ӱдыр-рвезе чодыра гыч мӧҥгыжӧ ноялын, йошкарген чевергалше чуриян пӧртыльӧ. Тиде теле каныш кече кужу жаплан шарнымашеш кодо. Йоча-влак ончыкыжымат «кайык столовыйыш» кошташ кумылаҥыч.