Марий тиште кече дене!

Кажне ийын 10 декабрьыште пӱтынь шемер калык Марий тиште кечым палемда. Школлаште поэт-писатель-шамыч дене вашлиймашым эртарат, тематический мероприятий-влакым ямдылат, тунемше-влакым марий тиштын вияҥ толмо корныж дене палдарат. Тыге самырык тукымым шке йылмынам, кугезе йÿланам аклаш да марий тÿвыранам йöраташ кумылаҥден шогат.

Официальный кагазлаште марий калыкын тиштыже 18-ше курымышто веле шочмылан шотлалтеш гынат, тамга семын тудо ятыр курым ожнак кумдан шарлен. Тудын дене кугезына-влак кечын пайдаланеныт. Тидым ме эре шарнышаш да акрет марий калыклан вуйнам савышаш улына.

Мемнан ойыртемалтше койыш-шоктышна, марий тиштым аралымына да вияҥдымына калыкнан ÿмыржым шуяш полшат. А кугезе йӱлам шуктен толмына, шочмо йылме дене кугешнен мутланымына акрет талешке-влакын чон гыч шолын лекше шнуй шкешамыштым аклымына нерген ойлат. Ончыкыжымат кугезе сугынь почеш илаш тÿҥалына гын веле марий калыкна шкенжын ойыртемалтше ямжым курымлан арален коден кертеш.

Пагалыме марий-влак! Тачысе пайрем дене пайдаланен, шке калыкнам пагалаш, марий тиштым да шочмо йылмынам утыр аклаш ӱжам. Тунам гына мемнан калыкнан ӱмыржӧ тиде ош тӱняште курымаш лиеш. Чылаландат пеҥгыде тазалыкым, кужу ӱмырым, вашла пагалымашым да волгыдо пиалым тыланем.

Пайрем дене!