Калык-влак нерген чыла палет?

«Кугу этнографий диктант» Всероссийский акций тений Российын кундемлаштыже 2 ноябрьыште эрташ тӱҥалеш. Диктантысе заданий-влак 30 йодыш гыч шогат: 20 йодыш чылалан икгай, кодшо 10 йодышыжо кажне кундемын шкенжын, тудлан гына келыштарыме лиеш.

Диктант калыкын этнографий грамотностьшым, Российыште илыше калык-влак нерген шинчымашыштым аклаш полшышаш. Диктантым возаш 45 минут пуалтеш, эн шукыжо 30 баллым погаш лиеш. Кӧн шке илыме верлаште шинчымашыжым тергаш йӧнжӧ уке, нуно Кугу этнографий диктантын www.miretno.ru сайтыштыже онлайн-тестированийым эртен кертыт. Йодышлан чын вашмутым сайтыште 10 ноябрьыште, кажне еҥын кузе возымыжо нерген уверым 12 декабрьыште савыктыме лиеш.

Российыште Кугу этнографий диктантым кумшо ий почела возат. Кодший Российын да йот эллан 2600 площадкыштыже чылаже 367 тӱжем еҥ возен. Тиде проект Президент грантын фондшо полшымо дене эртаралтеш.