Эн мотор селам да ялым ойырат

Республикыште «Башкортостанын эн мотор селаже» конкурсын икымше этапшым иктешленыт. Тудым «Башкортостан Республикын муниципальный образованийже-влакын Советышт» ассоциаций, Башкортостанын самырык депутатше-влакын ассоциацийышт да «Башкортостан» ТРК ГУП эртарат.

Конкурсыш кажне район гыч 5 тӱжем деч шагалрак еҥ илыман ик населенный пункт йодмашым колтышаш улмаш. Кызытеш 47 гыч 20-ым ойырен налыныт. Ты радамыш марий-влак тӱшкан илыме Мишкан районысо Йылыш ял, Краснокам районысо Коян села да Бирск районысо Кужнур ял логалыныт.

Икымше этапыште комиссий села ден ял-влакын тӱжвал сыныштым, историйыштым, еҥ-влакын шке илыме верыштым ямландараш кузе тыршымыштым, йӱлам арален кодымым да молымат аклен. Кокымшо этапыште сеҥышым ойырымо годым финалыш лекше-влакын телепрезентацийыштым да интерактивный йӱклымашым шотыш налеш. Марий ял-влак верч «Вконтакте» социальный сетьыште конкурслан лӱмын ыштыме лаштыкыште йӱклаш лиеш.

Э. АПТУЛМАНОВА.