Тазалыкетым терге да куржталаш лек

Россий кечым палемдыме лӱмеш куштылго атлетика дене VIII пелемарафон тений Нефтекамскыште 12 июньышто адакат тӱрлӧ кундем гыч тале спортсмен-влакым чумыра. Таҥасаш толшо-влак документыштым мандатный комиссийыш 11 июньышто 14 - 18 шагатыште, 12 июньышто 09 - 10.45 шагатыште оласе Ече спорт рӱдерыште пуэн кертыт (Ленин урем, 23-а). Судейский коллегийлан тазалыкым тергыме нерген врачын кидпалыжым печать дене пеҥгыдемдыме справкым, паспортын данныйжым, ИНН, страховой пенсионный свидетельствын номерыштым, мӧҥгысӧ адресым возымо заявкым ончыктыман. Пелемарафон дистанцийыш (21 км 100 м) лекше-влаклан 400 теҥге взносым тӱлыман, нунылан шарнаш кодшо футболкым кучыктат.

Пӧръеҥ-влак ийгот шот дене индеш, ӱдырамаш-влак вич тӱшкалан шелалтыт. Тиддеч посна 12-17 ияш ӱдыр-рвезе-влак 8 километран, 11 ияш деч изирак-влак 4 километран дистанцийыште таҥасен кертыт. Еш эстафетыште ачалан 1000, авалан 700, йочалан - кеч ӱдыр, кеч эрге - 350 метрым куржман. Пелемарафонышто икымше-кудымшо верлам налше пӧръеҥ-влакым, эн ончыч толшо кум ӱдырамашым призер семын палемдат, тиде корным сеҥен, мучаш марте эртыше кажне еҥлан шарнымаш медальым кучыктат.

И. ИВАНОВ.