+16 °С
Пылан
Все новости
Новости
24 Апрель 2018, 16:27
Сылнымут аланыште
«Шонымем каласем» поэзий книгашке вочшо шонымаш-влак
Помыжалте шошо
Да жап гыч мучашлалте.
Шавыш вӱдшым мландываке,
Нале ужар тӱсым мланде,
Одарланыш, весеме,
шулдыраҥе,
Шӱлалтыш, алым нале.
Илыш солныш кеҥеж жапыш.
Тудымат пӱртӱсын вес вийже
Алмаштыш,
Жапым нале.
* * *
Памаш вӱд гыч
Эҥер тӱҥалеш,
Кертмын вийым налын,
Корным кычалеш.
Ончем вӱдкорным -
Айдемын илышым ужам,
Тудат кычалеш
Шке пӱрымашым.
* * *
Ӱдыр шинчаш ончо
Лыжгаҥын.
Тый тудым йӧратет гын
Чотын.
Чын ончалтыш
Куандара шӱм-чоным
Ӱдырыным.
Муэш тыйын койышышто
Шӱм-чон эҥертышым.
Ит сусырто ӱдыр чоным,
Йӧратет гын тудым,
Пеледышым,
Лиеш ӱмыр пелаш.
Йӧратет гын тудым.
* * *
Ава кумыл - порсын,
Шӱм-чон лӱҥгалтыш.
Ава икшывыж пелен.
Тыгай илыш пӱралтын.
Кертеш мо аклен
Ава кумылым
Кушкын шушо Айдем?
* * *
Уш кычалеш вашмутым,
Шона ышташ мо кӱлешым.
Ушвий кӱлеш тидлан.
Но сита мо ӱнарже айдемын
Тыгодым.
* * *
Мастарлык кушкеш
Пашаште,
Уш-акыл полшымо дене,
Талант ден вӱдылалтын.
Пырляштыже
айдеме шочеш*
Илыш тӱзланыже манын.
* * *
Шочмо йылме, илыш-йӱла,
Сурт пече, еш
Шуарат айдемым,
Пеҥгыдемдат
Тукым вожым.
Нужнаҥеш илыш чон
Нуным йомдарыме годым.
* * *
Койыш-шоктыш
Кондышаш айдемым
Шонымашке:
Поро койыш-шоктыш
Конда йырысым
Аклымашке.
* * *
Илен лекташ ӱмырым
Шот дене,
Пайдалын,
Ушаҥын,
Кӱлеш палаш
Айдеме улметым
Ош тӱняште.
* * *
Ит шылтале мыйым
Утыжым.
Ок келше тылат
Каласаш осал шомакым.
Айда шинчына пырля,
Шинчаваш ончалын,
Ныжылгылыкым луктын,
Ойласен колтена,
Ик шонымашыш толын.
***
Шинчавӱд лектеш
Кугу куан годым.
Шинчавӱд йога
Кугу ойго годым.
Тек йога куан шинчавӱд
Илыме годым.
***
Уке айдемын шулдыр
Кайык тӱшкан семын,
Но айдеме шулдыраҥеш
Кумыл нӧлтмӧ годым.
* * *
Айдемылан поро мут - эм,
Ласка ончалтыш - эҥертыш.
Каҥаш, полыш -
Путырак кӱлешан эн-эн.
Порылык - ӱшан илыш корно.
Поро дене таҥлалтше
Ила кужу ӱмырым.
* * *
Йӧратымаш нулта
Айдеме чоным.
Куандара,
Ойгандара шотдымын,
Луктеш келшымашым
Ӱдыр-каче коклаште.
Йӧратымаш ок ончо
Ийготым.
Могай калык гыч
Лекмым.
Йӧратымашын родыжо
Икте-весым пагален,
Илышым чоҥымо корно,
Икте-весым умылен,
Шӱм-чоныш пурымо
Ӱмытлӧ**
*Шочеш-кушкеш шуаралтын, шотын, шот дене, шотаҥын.
**Ӱмытлӧ (эрвелмарла) - ӱшанле, ӱшан.
П. АПАКАЕВ.
Йошкар-Ола.
Читайте нас:
© 2024 «Чолман». Республиканская общественно-политическая газета на марийском языке. Издается с 24 апреля 1991 г.
Главный редактор - Губаев Игорь Иванович.
При использовании материалов гиперссылка на сайт cholman.info обязательна.
Категория информационной продукции 12+
Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.
Мы в соцсетях:
ВКонтакте - vk.com/cholman
Telegram - https://t.me/cholmantv
Я.Дзен - https://dzen.ru/cholman
ОК - ok.ru/cholmanrb
TikTok - tiktok.com/@cholman.tv
Телефон
Телефон: 8(34783)7-07-97.
Электрон почто
Адрес
Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж.
Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».