Пӱрӧ ола талешке кечым палемден

26-шо апрельыште марий калык чапле пайремым палемда. Тиде кечын ме шке калыкна кокла гыч лекше талешке-влакым шарналтена. Пошкырт кундемыште илыше калык деке тиде пайрем пешыжак толын шуын огыл, тудым утларакшым школлаште веле палемдат.

Но Пӱрӧ олаште «Виче марий» мер автономий Талешке кече нерген эреак шижтараш тырша. 19-ше апрельыште «Марий Эл» кугыжаныш куштышо ансамбль концертым ончыктыш. Тудын вуйлатышыже, Славик Михайлович Асмаев, Пошкырт кундемын шочшыжо, Кужнур ялын эргыже. Вуйлатыме ансамбльже тений калык коклаш «Марий парк» чапле у программе дене лектын. Тудо самырык-влакын 70-80-ше ийласе илышышт дене палдара. Мутат уке, С.М. Асмаев марий калыкын уста талешкыже улеш, садланак «Виче марий» мер организаций Славик Михайловичлан да «Марий Эл» ансамбльлан Чап кагазым кучыктен. Концерт деч вара Пӱрӧ тӱвыра полатын фойештыже талешке кечылан пӧлеклалтше марий дискотекым эртарыме.

А. ИЛИЕВА.