Илышна могай лиеш?

«Кугыжанышын куатшын негызше - калык, садлан калыкым арален кодаш, илышыжым уланрак ышташ манын, тале ошкыл кӱлеш», - каласен Владимир Путин. Тудын мутшо почеш, тидлан ончыкылык правительство калыкын парышыжым кугемден толмо, куд ий коклаште нужналыкым кок пачаш шагалемдыме, демографий саемме верч тыршышаш. Пенсийым кугемдыман, индексацийым ыштен шогыман, пашадар ден пенсий коклаште ойыртемым иземдыман. Илыме верым ситараш манын, калыкын парышыжым кугемдаш да ипотечный ставкым 7-8 процент марте волташ, ВВП-н 5 процентше марте медицина сферылан ойыраш темла.

Калык улан илыже манын, элыштына экономика виян лийшаш. Президентын ойлымо почеш, Россий эн виян вич экономика радамеш ӱшанлын вераҥшаш. Тидлан 2025 ий марте ВВП-м 1,5 гана кугемдыман, тӱҥ отрасльлаште паша лектышым нӧлталман, ферма да еш предприятий-влаклан, чумыр ял озанлыклан полшыман, паша климатым саемдыман, предприниматель-влаклан налог отчетностьым куштылемдыман.

Шуко еҥлан элым аралыме шотышто ойлымыжо эн чот шарнаш кодын докан, молан манаш гын южо стратегический военный разработка шотышто «пӱрдышым» кораҥден да видеопрезентацийыште куатыштымат ончыктен. «Ончыч Россий дене нигӧн кутырымыжо шуын огыл гын, ынде колышташ логалеш. Но Россий нигӧм ынеж лӱдыктыл, Соединенный Штат-влак да Евросоюз дене келшыше конструктивный кылым ышташ шона. Москва партнер-влак честный, тӧр праван вашкылым ойырен налыт манын ӱшана», - палемден В. Путин.

Выступлений мучаштыже Россий Президент пытартыш ийлаште эл вуйлык-влакын да калыкын тыршымышт дене тугай вашталтышым ыштен кертмым палемден, кудым ышташ молылан курымла кӱлыт. Российыште пашам ыштыше чын еҥлан да служитлаш ямде улшылан йӧн эре лиеш, ешарен тудо.

Э. АЛЕКСЕЕВА ямдылен.

«Kremlin.ru» сайт гыч налме фото.