Сайлымашке вашталтышым пуртымо

Тений 18 мартыште Россий Президентым сайлымашлан ямдылалтме паша республикыште умбакыже шуйна. Палемдаш кӱлеш, тенийсе сайлымаш радамыш икмыняр вашталтышым пуртымо. Нунын кокла гыч иктыже - шкалан келшыше избирательный участкыште йӱклымаш. Вес семынже, те кызытсе жапыште регистраций почеш огыл, а вес вере иледа, тыгак тиде кечын командировкышто, канышыште, моло верыште лийыда гын, 18 мартыште шкалан йӧнан сайлыме участкыште йӱклен кертыда. Тенийсе сайлымашын нине ойыртемже-влак нерген рашынрак эртыше вӱргечын Нефтекамскысе Территориальный сайлыме комиссийын вуйлатышыже Д. Фарвазов верысе журналист-влаклан ола администрацийыште пресс-конференций годым каласкалыш. Вес вере йӱклашлан йодмашым РФ ЦИК-ын cikrf.ru сайтыштыже «Шке избирательный участкым кычал му» сервис але «ТИК и УИК на карте России» интерактивный картын полшымышт дене, ЦИК-ын справочный рӱдерысе 8 800 707 2018 тугок телефоныш йыҥгыртен, тыгак 12 март марте Территориальный сайлыме комиссийыште (ТИК), Шуко функциян рӱдер-влакын филиалыштышт (МФЦ) але «Государственные услуги» единый портал гоч, а 25 февраль гыч участковый избирательный комиссийыш (УИК) пуаш лиеш. Тылеч посна Дилус Мазгарович Россий Президент лияш кандидат-влакын выдвижений, регистраций шотышто ойыртемышт да избирательный законодательствын моло радамже нерген умылтарыш.

Палемдаш кӱлеш, 31 январьыште Россий ЦИК калык деч РФ Президент лияшлан кандидат-влаклан полыш семын кидпалым погыман подписной лаштык-влакым налмым чарнен. Кызыт Рӱдӧ избирком нине документ-влакым терга. Сайлыме бюллетеньлаште кандидат кандаше деч шуко ок лий, туге гынат нунын чотышт 10 февральлан рашемеш, палемден Россий ЦИК вуйлатыше Элла Памфилова. БР Общественный палатын увертарымыж почеш, Башкортостаныште сайлымашым 3435 избирательный участкыште 10 тӱжем эскерыше текшыраш тӱҥалеш.

Л. ШАВАЛИЕВА.

Снимкыште: Д. Фарвазов.