Йылме-влакым арален кодымо нерген

Эртыше вӱргечын Башкортостан Республикысе Кугыжаныш Собраний - Курултайыште республикысе калык, тыгак кугыжаныш йылме-влакым арален кодымо да вияҥдыме нерген кугыжаныш программылан общественный экспертизым эртарыме шотышто пашаче тӱшкан погынымашыже лийын. Тиде документ регионышто илыше калык-влаклан шочмо йылмыштым арален кодаш, кугыжаныш йылме-влакым нимогай чарак деч посна тунемаш йӧным ышташ полшышаш. Проектым БР Наука академий ямдыла, экспертизыжым БР-ысе Калык-влакын ассамблейышт да БР Общественный палата эртарат. Программым вич ийлан ямдылат. Документым 1 февраль марте ыштен шуктышаш улыт. Каҥашымашыште тыгак законодательный, исполнительный кугыжаныш кучемын, Образований министерство, Рособрнадзор, Тӱвыра министерство пеленсе общественный советын еҥже-влак, национально-культурный ушем-влакын вуйлатышышт, йылме политика шотышто федерал да республикысе законодательствым эскерыше пашаче группын специалистше-влак лийыныт.

Л. ШАВАЛИЕВА.