Эл вуйлык республикын пашажым аклен

Башкортостаныш Россий Президент Владимир Путин толын каен. Тудо «Ростех» кугыжаныш корпорацийыш пурышо «Уфасе моторостроительный производственный объединений» ПАО-н пашаже дене палыме лийын. Оборонно-промышленный комплексын организацийже-влакын кӱкшӧ технологиян продукцийым лукмышт шотышто погынымашым эртарен. Владимир Путинын мутшо почеш, ОПК предприятийлаште лукмо сату 2025-ше ийлан 30 процентлан, 2030-шо ий марте 50 процентлан ешаралтшаш.Тыгодым кӱкшӧ качестван да ак шотышто конкурентым чытен кертше лийшаш. Президент дене вашлиймаште завод пашаеҥ-влак оборонно-промышленный комплексын ончыкылыкшо, пашазе профессий-влакын престижыштым шарыме, нунылан социальный полышым пуымо йодыш-лам тарватеныт.

Владимир Путин да Башкортостанын Вуйлыкшо Рустэм Хамитов регионын социально-экономический илышыж дене кылдалтше актуальный йодыш-влакым лончыленыт. «2017-ше ийым ме уда огыл производственный показатель-влак дене мучашлышна. Республика ончылно шындыме задаче-влакым шуктымо. Парыш ешаралтын», - каласен регион вуйлатыше.

В. Путин Башкортостаныште ипотека шотышто кокла ставка 9,75 процентыш шумым да, чумыр ончымаште, тиде элысе деч ӱлышрак улмым палемден. Рустэм Хамитов эл вуйлатышылан тыгак 2012 ий 7-ше майысе Указ-влакым шуктымо шотышто республикыште могай пашам намийыме, нефтехимий комплексым вияҥдыме проблеме-влак, кундемыште Еш идалык кышкарыште икшыван еш-влаклан полышым пуымо, кундемыште пашадар 3,4 процентлан ешаралтме нерген ойлен.

Россий Федераций Президент тыгак Уфасе икымше Соборный мечетьыш миен коштын, Верховный муфтий, Российысе мусульман-влакын Рӱдӧ духовный управленийыштым (ЦДУМ) вуйлатыше Талгат Таджуддин дене вашлийын.

Л. ГРИГОРЬЕВА.