Модыч, юарлышт, мужедыч

Шорыкйол тылзын ик оҥай йӱлаже - тиде мужедмаш. Меат модыш коклаш тыгай мужедмашым пуртышна. Куд стаканеш вӱдым темышна, модшо-влак, шинчаштым кумалтен, ик стаканже гыч вӱдым подылшаш ыльыч. Кӧлан сакыран, кӧлан шинчалан, кӧлан тыглай, нимодымо вӱд логалын. Сакыран логалеш гын - илышет весела лиеш, шинчалан гын - нелырак, шинчавӱдан, яндар гын - ласка, маныт. Ме йоча-влаклан яндар вӱдым гына ямдылышна, но тидын нерген ышна каласе. Нунылан кызытак шӱлыкан илыш огеш кӱл, тек тудо веселан да порын шуйна. Воктенышт шергакан авашт, пашаче ачашт лиеш. Кажне икшыве сакыран але яндар вӱд логалже манын шонен. Чылаштлан тыгай мужедмаш пеш келшыш. Тугак кӧршӧк кырен, мешак чиен, тюбинг, издер дене таҥасымашым эртарышна. Крешенем чылт спорт пайремыш савырышна. Йоча-влак юарлен, икте-весылан полшен модыч. Кажне йоча, пӧлекым налын, мӧҥгыжӧ куанен кайыш. А мыланна, организатор-влаклан, йочан куанже - эн кугу пӧлек.

Л. АЛЫНБЕКОВА, Йывангасола культура пӧртын вуйлатышыже.

Снимкыште: Спортлан шӱман улына - таза, патыр кушкына!