Эн сай марий йылме кабинетым ойырат

Мишкан районысо образований учреждений-влак коклаште «Эн сай марий йылме кабинет» смотр-конкурсым увертарыме. Тушко ушнаш йодмашым тений 1 февраль марте колтыман. Участник-влак 30 март марте образований пӧлкаш кабинетын портфолиожым, марий йылмын кӱлешлыкше нерген «каласкалыше» буклетым, кабинетыште тунемше-влак дене класс деч ӧрдыжсӧ пашам эртарыме нерген папке-раскладушкым намийышаш улыт.

Аклыше комиссий тунемме кабинетын паспортшо, кабинетыште туныктымо да методический пособий, стенд, буклет, технический средства, инструкций-влак улмым, туныктымо сомылышто кучылтмо оборудованийым аралыме радамым, туныктышын паша верже могай улмым, кузе сӧрастарымым шотыш налеш.

А. КИЛИНБАЕВА, образований район пӧлкан специалистше.