Паша деч посна кодыныт

2017 ийыште Уфасе 548 предприятий ден организацийлан 9,3 тӱжем утла еҥым паша гыч луктын колташ верештын. 4,8 тӱжемже вес вере, 2 тӱжем утлаже шке организацийыштак пашам муыныт. 650-же Калыклан паша верым ситарыме рӱдерыш полыш йодын миен. Лишыл жапыште эше 3,8 тӱжем еҥ пашадыме радамыш логал кертеш, увертара рӱдоласе Калыклан паша верым ситарыме рӱдер.

Пашадыме-влаклан кызыт эн шагалже 977,5, эн шукыжо 5635 теҥге пособийым тӱлат. 1 январьлан шотлымаште республикыште эн изи пособийым 5,6 тӱжем, эн кугужым 11,4 тӱжем пашадыме семын официально регистрироватлыме еҥ налеш.

Э. АПТУЛМАНОВА ямдылен.