Сӱретче-влак коклаште - у лӱм

Ноябрьыште эртарыме марий культура кече-влаклан пӧлеклалтше пайремыште РДК-н фойештыже марий сӱретче-влакын выставкыштымат ужаш йӧн ыле. Мутат уке, Валерий Шамсутдиновын лӱмжӧ мемнан кундемыште профессионал-портретист семын шарлен. А теве Надежда Галановам (Асылбаевам) сай палат манаш огеш лий.

Янахмат селан ӱдыржӧ Благовещенск педколледжым тунем лектын, вара БГУН-н Бирск филиалыштыже художественно-графический факультетыште шинчымашым поген. Кызыт Уфаште 111-ше гимназийыште йоча-влакым сӱретлыме искусствылан шӱ-маҥда. Шочмо кундемышкыже коклан толын кайымыж годым самырык сӱретче вий-куатым погымо гай лиеш, очыни, молан манаш гын Янахмат села пӱртӱс лоҥгаште, ямле вер-шӧрыштӧ верланен, шке шочшыжым пуйто усталык корныш ӱжеш. Ожно тыште мутмастар Шадт Булат икымше почеламутшым возен, колымшо курымын кокымшо пелыштыже вес сӱретчын, икмыняр ий ожно илыш дене чеверласыше Рафаэль Латыповын, сӱретше-влак шочыныт. Надеждан усталыкшым Янахмат пелекыдалаш школын туныктышыжо

Н.А. Минликаева, вара школ директор, тудак рисованийым намийыше ужын шуктеныт да умбакыже шуаралташ кумылаҥденыт. Сӱретчын аважын, селасе книгагудо вуйлык Лиза Минилбаевнан мутшо гыч, ачажат, ончычсо механизатор Владик Бикъянович, удан огыл сӱретла. Кӧ пала, илен-толын, ала мемнан вел сӱретче ӱдырын лӱмжат кумдан палыме лиеш?

А. АСМАЕВ.