Правилым от шукто гын…

Корнышто коштатат, могай гына азапыш от логал! Ятыр ий ончыч Уфашке «Мицубиси» легковой машинам налаш мийышна. Уфа гыч Благовещенск марте автомашинам племянник виктарыш (Тушто ила.). Чайым йӱын лекнат, умбакыже рульым пелашем кидыш нале. Куаненна, ушет кая - импорт машинам налынна вет! Тидыжым-тудыжым туныктышт изишак. Николаевка ял мучашыште ик машина эркын гына кая, эртен кайышна коеш тудым. Ончена - ончылно гаишник-влак! Мемнам шогалтышт, пелашемым документ-влак дене шке машинашкышт ӱжыч. Мый шинчем. Вес милиций пашаеҥже, омсам почын, «Машина сай мо?» йодо. «Айват, новая же, при том японская», - малдем. Воштылын, омсам петырышат, служебный машинаж деке ошкыльо. Ик жап гыч пелашемым колтышт. «От души содрали, 700 рублей отдал. Нашли причину: обгон, а фары не горят. Еще ты сидишь без ремня», - пелештыш тудо. (Милиций пашаеҥын машина омсам воштыл петырымыжым тунам иже умылышым). «Ну и ладно, пусть радуются, от нас не убудет» шкем лыпландарен, умбакыже тарванышна. Ик гаишникын мутшым омак мондо: «Уважающий себя водитель уже около гаража на себя ремень оденет и пассажира предупредит».

Эше шкенан ялыште илыше Совет Союз Ушемын Геройжо Д.И. Лазаревын ойлымыжат ушыштем. Илымыж годым ялыш толеш ыле. Акаж дене ме пошкудо ыльна. Тӱрлӧ мыскарам ойлаш мастар ыле. Шкеж дене лийше ик случайым ойлымыжым шарнем. «Ик эрдене машина дене пашаш каем. Трук кушеч дыр милиций толын лектеш. Чӱчкыдын ременьым пижыктен омыл - кум теҥге штраф. Тӱлышым. Эрлашыжлан корныш вигак ременьым пижыктен тарванышым. Ончем, адак тудо верешак саде милицияк мыйым шогалта. Тояж дене ременьым нӧлтале да «Луш пижыктенда, кум теҥге штраф» мане. Тӱлышым. Кумшо кечын ременьым чот гына шупшыл пижыктышым. Садет адак мыйым авыра. «Ит куане, ынде штрафым тӱлыкташ амалет уке», - шоналтышым семынем. Омсам почо да ременем шупшыл ончыш. «Мо, кум теҥге штрафлан верч ременьда дене пикталт колынеда мо?!» - уло йӱкын воштыл колтыш».

А. АРТАМОНОВА.