Газет дене йолташ улына

«Марий улам - марла лудам» акцийыш меат уло кумылын ушнышна. Ме - тиде Монар школын туныктышо коллективше.

Тиде фотоснимкым лач педкаҥашым эртарыме жапыште войзымо. «Марий улам - марла лудам» акций нерген увертарымеке, туныктышо коллегем-влак пырля ушнаш рӱж келшышт. Почта гоч кӧ могай газетым, журналым налме шотышто ончылгоч анкетированийым эртарышна. Вара «Чолман» газет нерген икмыняр ой-каҥашым тарватышна. Иктешлен каласаш гын, марла газетым налаш, лудаш нигӧ тореш огыл. Коллективыште ик руш да ик башкир туныктышо ӱдыр-влак деч посна чылан марий улына, шке коклаштына эре марла кутырена. Перемен жапыште йоча-влак денат марла мутланена. Урокыштат рушла ойлымо деч вара марла умылтарена. Сандене мемнан дене марий йылме огеш йом манын ӱшанлын каласен кертына. Марий йылмым школыштына ятыр ий Александра Сапараевна Ибаева туныкта. Кызыт тудын деке практикым эрташ Пӱрӧ оласе пединститут гыч Константин Гайнетдинов толын. Студент (ончыкыжым марий йылмым туныктышо) марий йылме урок-влакым моштен эртара. Школ директор Роман Ибакович Ибаеват марий йылме деке шӱман. Школлан кушеч гына лиеш, эре марла журнал-влакым конденак шога. Йоча-влак дене ме шкежат нине журналлам да марла газетлам библиотекыштына эре шерын лектына. «Чолман» газетлан подписка - тиде вет пӧлекат лийын кертеш. Шочмо кечылан але иктаж-могай вес пайремлан, кеч нимогай амал деч посна йолташлан, шочшылан пуаш лиеш. Ме ешна дене шукертак тиде газет дене келшена - подпискым эре ыштена. Тыгак вес ялыште илыше ачана-авана-влаклан пӧлеклышна. Мотор Тӧлдӧ ялыште илыше Марина ден Николай Апаевмытлан У ий гыч тӱҥалын «Чолман» газетым почтальон кондаш тӱҥалеш. А ме шкенан школ илышна нерген, тыгак ялысе увер-влакым газетыш эре колтен шогаш тӱҥалына.

И. ЗАХАРОВА, Монар школын туныктышыжо да воспитательже.