Кумылым нӧлтышӧ вашлиймаш

Аван кечыже - тиде эн лишыл, йӧратыме айдемылан пӧлеклыме волгыдо пайрем. Вашлиймашыш «Саскавий» ӱдырамаш ушемын еҥже, ава, лудшына, тыглай уна-влак толыныт ыле. Нуно пеленышт кӧстенечым налыныт да пайрем ӱстелым сӧрастареныт. Мероприятийыште шуко икшыван ава-влакат ятыр ыльыч. Тиде Л.М. Шайдуллина, Л.В. Владимирова, Р.С. Изимариева. Кушташ да марла муро, такмак-влакым мураш Е.И. Ильчибаева моткоч йӧрата. Ийготшо дене 80 ийым эртен гынат, пайремлаште эре вучымо уна улеш. Тудо кечын, 26 ноябрьыште, верысе кидмастарна Тамара Яндугушевна Данилован шочмо кечыже лачеш толын ыле. Тудо ятыр ий ӱдырамаш-влаклан сылне марий тувыр-влакым урга. Пайремыште тудымат саламлышна, шочмо кечыже лӱмеш мурым пӧлеклышна.

Пайремыште «Йомак тӱня», «Экологий модыш» викторина-влакым эртарышна. Чын вашмутлан ава-влаклан жетоным кучыктышна. Эн шуко жетоным Татьяна Николаевна Пасетова погыш. Могай ушан, шонкален моштышо, чолга, уста, талантан, мотор улыт мемнан авана-влак! Р.С. Изимариева чыла ава-влаклан почеламут-влакым йоҥгалтарыш. Пайремышкына поэтесса, ончычсо туныктышо Валентина Асылбаевна Кумушбаева да тудын тунемшыже-влак Р.А. Михайлова ден О.И. Ардуганова толыныт ыле.

Ик пайремат мемнан кумдан палыме, йӧратыме гармоньчо Б.А. Ибаев деч посна ок эрте. Мучаште тудын весела семже почеш тӱвыра пӧртын залыштыже «Кандырам» да «Вич мужыр» куштымашым куштышна, ава-влак нерген рушла, марла мурым йоҥгалтарышна.

М. ИСЛАЕВА, библиотека пашаеҥ.