Кӱлешан улат, газет!

«Чолман» газетым 2010-шо ий годсек налам, толын шумыжым шӱм вургыжын вучем. Газет лаштык гоч шкенан калыкнан илышыжым пален налаш лиеш. Пеш кӱлешан улеш «Чолман» газет тачысе саманыште. Шымлен лудам, ик лукшым кодыде.

Теве газетын ик номерыштыже савыктыме «Марий-влаклан шочмо йылмышт уто лийын?» статьяда шӱмешем чот логале. Шкенан йылмылан тореш шогышо еҥ-влакат улыт мо ош тӱняште? Тунарак шонен моштыдымо улыт мо? Кушто шочыныт да кушан кушкыныт?

Мый шкеже 71 ияш пенсионер улам. Телевизорым ончен гына, яра ом кий - кечын уремыште шогылтам, еҥ-влакым ужын, вашлийын, мутланен коштам. Мемнан калыкна эркын шагалемеш. Йылмына, калыкна марий ял-влаклан кӧра гына илат манын шонем. Тиде ял-влак ынышт пыте ыле манын тургыжланем: нуно илат гын, калыкнат огеш пыте, йылмынат.

Эртыше курым мучаште статистика почеш 622 тӱжем еҥ лийынна, а кызыт мыняр улмынам раш ом пале. Ешаралтынна манын ом шоно, изишак шагалемынна, очыни. Павловкышто марий-влак рушла мутланаш тыршат. Мый кертмем семын нуным тӧрлатем. «Марла мондышыч мо?» манамат, марла ойлаш тӱҥалыт.

Павловка селаштына шӱдӧ наре марий еш уло. Изиэм годым, витлымше-кудлымшо ийлаште, Шопкер ялем 96 кудан ыле, а ынде 70 гына кодын. Мыйын кочамын кугу, кумда пӧртшым клубыш савыреныт ыле. Суртешыже самырык-влак тич погыненыт. Кушташат вер ок сите ыле. Гармонист-влак ик-кок кудо коден илат ыле, а ынде ик гармонист уло. Илыш чынак вашталтеш.

Н. МИКИШКИН.