Спорт дене кыл пеҥгыде

Куржаш йӧн лекме годым мишкан спортсмен-влак тӱрлӧ кундемлашке вийыштым тергаш лектын коштыт. Тидын шотышто поснак тренер-преподаватель Лариса ден Сергей Мурзашевмытым, Юрий Айгузиным палемдаш лиеш.

Ноябрь тӱҥалтыште куштылго атлет-влак Татарстан Республикысе Уруссу поселкышко межрегиональный таҥасымашке чумыргеныт. Вате-марий Мурзашевмытат йоча-влакым намиеныт. Дима Яншаев да Валентина Сагитова 1000 метр дистанцийыште икымше верым налыныт, Люба Мурзашева да Эрик Каптиев кумшо верыш лектыныт. Дима Зайнакаев 300 метрым куржын, кокымшо результатым ончыктен.

24-26 ноябрьыште Татарстан Республикысе Нижнекамск олаште тале спортсмен Ю. Жадовскийым шарныме лӱмеш куштылго атлетика дене таҥасымаш эртен. Тушто Мишкан районын командыжат вийжым терген. Тренер-преподаватель Ю. Айгузинын, С. Валитовын, Мурзашевмытын воспитан-никышт сайын выступатленыт.

Рвезе ден ӱдыр-влак шке ийготан группышт дене куржыныт. Геннадий Мурзашев (2000-2001 ий, 1500 м, 800 м) кокымшо да нылымше верлам налын. Дима Яншаев 2002-2003 ийготан спортсмен-влак коклаште абсолютный чемпион лийын, 800 метрыш куржмаште кокымшо результатым ончыктен. Эрик Каптиев тудын деч изишлан вараш кодын, кокымшо верыш лектын, 800 метр дистанцийыште нылымше толын. Александр Ямбаев кумшо да визымше верлам налын. Ӱдыр-влак коклаште Валентина Сагитова 400 метрыш куржмаште нылымше верым налын, 800 метр дистанцийыште кумшо лийын.

Е. МАТВЕЕВА.