Марий вургемым тӱрлашат туныктеныт

Семинарыште республикысе калык-влакын тӱвыраштым вияҥдыме рӱдер директорын алмаштышыже Г.А. Габдрахманов, тиде рӱдерын пӧлкажым вуйлатыше Р.Р. Де-

дюлева, Менделеевский районысо тӱвыра управлений вуйлатыше Е.К. Шигапова, Марий Элысе Калык усталык рӱдер вуйлатышын алмаштышыже А.В. Фомина, Звенигово районысо «Калык мастар-влак» пӧртын специалистше-влак И.В. Чугунова, Н.Е. Майкова пашам ыштеныт, теорий деч посна эше практический ужашым, мастарлык-классым эртареныт.

Марий йӱлам, тӱвыра аланыште кугезе койыш-шоктышым, фольклорым илышыш шыҥдарыме шотышто кок республикысе паша опытым шымленыт, калык усталыкым вияҥден колташлан методический полышым пуэн шогымо кылым вияҥдыме нерген каҥашеныт. Мутлан, марий вургемым кузе тӱрлаш кӱлмым ончыктен гына пуэн огытыл, туныктымо занятийымат эртареныт. Тидлан семинарыш ӱжмӧ еҥ-влак лӱмын имым да шӱртым намиеныт.

Менделеевский районышто марий тӱвыра пашам шуктымым Элнет ялысе тӱвыра пӧртыштӧ, Памашэҥер ялысе клубышто онченыт. Семинарым «йыргешке ӱстел» йыр мутланымаш дене иктешленыт.

Л. МИХАЙЛОВАН колтымо материал-влак негызеш ямдылыме.

Cнимкыште: Сценке гыч ужаш.