Йӱкшӧ, сын-кунжо кумылыштым савырен

«Калык вокал» да «Эстрада вокал» номинацийлаште усталыкым тергаш Пермь ола ден Пермь край, Башкортостан, Удмуртий, Чуваший, Марий Эл республикыла, тыгак Нижегородский, Свердловск да Архангельск областьла гыч 200 наре мурызо чумырген. Ончаш мийыше калыкым сценын мастарже-влак шочмо-кушмо верым йӧратыме, ешым пагалыме нерген, тыгак сар годсо муро-влак дене куандареныт.

Башкортостан Республикын чапшым Туймаза олан, Краснокам да Калтаса районлан артистышт араленыт. Калтаса селасе тӱвыра пӧртын солисткыже, марий ӱдыр Кристина Русиева сылне йӱкшӧ дене жюрин кумылжым савырен кертын да «Мое Отечество - Моя Россия!» фестивальын кокымшо степенян лауреатше лийын. Тиде РДК-нак «Барыня» мурышо калык ансамбльже фестивальын дипломантше лийын пӧртылын. Келшыше участникым фестивальын унаже-влаклан «Калык йӱклымаш» полшымо денат ойыраш йӧн лийын. Пермь оласе «Воскресение» ансамбль да Калтаса район Савакмарий ялын яндар йӱкан ӱдыржӧ Кристина Русиева туштат сеҥышыш лектыныт.

Л. ШАВАЛИЕВА.

Снимкыште: К. Русиева.