Икымше конкурсышто самырык пӧръеҥ-влак предприятийышт да шкешт нерген оҥайын каласкаленыт гын, кокымшо конкурсышто усталык памашышт дене палдареныт - мурым муреныт, шке возымо почеламутыштым ойленыт, куштымашым ончыктеныт. Кумшо «Признание» конкурсышто рвезе-влак илыш, лишыл еҥышт, ешыштын нунылан шерге улмышт нерген каласкаленыт. Мучаште чыла участникым тӱрлӧ номинацийыште палемденыт. Марий рвезе-влак В. Алымбеков «Мистер популярность», Д. Ильин «Мистер обаяние» номинацийлаште сеҥеныт. Гран-прим да «Мистер НефАЗа-2017» лӱмым А. Игнатов сеҥен налын. Палемдаш кӱлеш, марий рвезе-влак Валерий ден Дмитрий коктынат Краснокам район Йывангасола ялсоветын шочшыжо улыт.